高通CEO安蒙：AI代理將取代智能手機，成為數位生活核心

代幣海嘯殺到埋身

安蒙呢個咁宏大嘅願景背後，係一個極之驚人嘅運算需求預測。佢將AI嘅進化分成三個等級，每一個等級消耗嘅「代幣」（Token，AI模型處理數據嘅基本單位）數量都以幾何級數咁飆升 ：

• 第一級：對話式AI，大約要用1萬個代幣，即係而家大家見慣嘅一問一答模式。
• 第二級：多步驟推理，需求即刻升咗十倍，去到成10萬個代幣，AI開始識得處理更複雜、多回合嘅問題。
• 第三級：自主代理任務，呢個就係真正引爆點。當AI要獨立行動，橫跨幾個步驟同應用程式嚟完成一件事，每一次任務就要消耗成100萬個代幣 。

隨住世界慢慢轉向呢個第三級，高通預測，全球AI代幣需求將會喺 2030年前急升40倍。間公司估計，需求會由2026年嘅每10秒約317億個代幣，去到2030年同樣時間內嘅1.27兆個 。呢啲工作將會以「機器嘅速度，唔係人類嘅速度」嚟創造，係成個基礎設施嘅核心挑戰 。

Snapdragon X2 同 PC 新戰場

為咗喺裝置本地端頂住呢啲龐大嘅工作量，高通係咁拓展佢嘅PC處理器陣容。旗艦級嘅Snapdragon X2 Elite同更高效能嘅X2 Elite Extreme版本早喺今年CES 2026已經亮相，安蒙今次就再次強調佢哋嘅重要性。呢兩粒U基於第三代Oryon CPU架構打造，內置嘅NPU（神經網絡處理器）可以提供高達80 TOPS（每秒萬億次運算）嘅AI效能，如果谷埋CPU同GPU，更加可以突破100 TOPS 。

早排新鮮出爐嘅Snapdragon X2 Plus，就係專門設計嚟將呢種旗艦級嘅AI運算力帶落大眾市場。佢喺CES 2026發布，針對中階Windows筆電，有6核心同10核心兩個版本，同樣配備80 TOPS NPU，誓要推動新一波平民版嘅Copilot+ PC熱潮 。

最新嘅目標式出擊係Snapdragon C晶片組，喺Computex前夕先至亮相。C系列專為入門級AI筆電而設，目標係學生、家庭同小企業，令裝置端AI功能進一步「民主化」，人人有得用 。

「One More Thing」：蜻蜓（Dragonfly）飛入數據中心

臨完場嗰陣，安蒙就使出蘋果教主嗰招「One more thing」，正式公布全新產品品牌高通蜻蜓（Qualcomm Dragonfly），標誌住高通正式踩入AI數據中心市場 。呢個舉動可以話係將高通喺流動裝置上嘅高效能、低功耗技術，擴展到伺服器基礎設施，特別係針對AI推論（Inference）嗰瓣。Dragonfly呢個品牌，令高通成個產品組合，由毫瓦級別嘅穿戴式裝置到兆瓦級別嘅數據中心，真係由頭包到落尾 。

不過，今次公布只係「有姿勢，冇實際」，得個預告。安蒙喺演講入面冇披露具體晶片細節、效能數據或者有咩大客。所有實質嘅產品同財務細節都留返俾 6月24日喺紐約市舉行嘅「投資者日」（Investor Day） 先至會揭盅 。就係因為冇即時嘅細節，消息一出，高通嘅股價第二日即刻「見光死」。啲投資者本來預期會有實際spec，結果乜都冇，加上對手輝達（Nvidia）同時又有新公布搶曬鏡，唔少資金就即刻散水 。

唔止得手機：汽車、機械人同6G

安蒙亦都重點提到代理式AI喺其他幾個關鍵領域嘅變革性影響。

• **互聯汽車：**佢展示咗車內AI代理點樣改變緊成個駕駛體驗。演講提到，受Snapdragon數碼底盤（Snapdragon Digital Chassis）平台帶動，高通嘅汽車業務喺2026年第二季嘅年度化收入已經突破50億美元，更加預計喺財政年度完結前，呢個數字會衝破60億美元 。
• **機械人同工業自動化：**演講將Snapdragon平台定位為新一代智能機械人嘅「大腦」，通過裝置端處理，令機械人可以喺工業環境入面做到自主嘅即時決策 。
• **6G無線通訊：**安蒙認為6G將會係未來代理式AI世代嘅必要「AI原生」網絡基礎。呢個下一代無線標準嘅設計初衷，就係要嚟連接同協調數以十億計嘅智能裝置，由電話、汽車到傳感器同機械人。呢個諗法，佢早喺2026年世界流動通訊大會（MWC 2026）已經初步講過 。