記憶體海嘯殺到！中國手機市場大洗牌 只有華為頂得住

華為嘅「有錢人唔志在」策略

成個市道哀鴻遍野之際，華為反而成為咗例外。Counterpoint嘅數據指出，華為係唯一預計喺2026年上半年能夠增加出貨量嘅主要中國品牌 。

呢種抗跌力並唔係撞彩。當小米、傳音呢類品牌仲係靠大量出平價入門機去搶市場，根本冇空間將成本轉嫁俾消費者嗰陣，華為嘅強項正係佢嘅高端定位 。華為嘅客群對手機加多一千幾百蚊相對冇咁敏感，令公司可以更輕鬆咁消化或者轉嫁成本，唔怕需求會即時仆直。就係靠呢個「有錢人唔志在」嘅市場定位，華為即使面對全行記憶體成本見頂，依然喺2025年全年以16.9%嘅市佔率，保住中國市場一哥嘅位置 。一個供應鏈危機，反而變咗做華為嘅競爭優勢。

Counterpoint睇淡2026全球市道

Counterpoint Research已經大幅下調咗佢哋對2026年全球智能手機嘅出貨預測，而家估計全球出貨量會跌2.1%——同之前預計嘅持平甚至輕微增長比較，係一次好大嘅預測調整 。研究機構明確指出，「記憶體短缺導致零件成本急升」係罪魁禍首 。

初步數據比全年預測更加難睇。2026年第一季，全球實際出貨量已經按年萎縮咗6%，因為DRAM同NAND嘅供應短缺唔單止搞亂晒成個生產計劃，亦都打擊埋本來就唔係好掂嘅消費氣氛 。不過，個天要落雨，有啲人會帶遮。Counterpoint認為，蘋果同三星憑住佢哋嘅供應鏈控制力同高端品牌定價能力，係最能頂得住呢場風浪嘅廠商 。事實上，蘋果喺2026年Q1嘅出貨量逆市升咗5%，仲係第一次試過喺首季就攞到全球市場嘅冠軍寶座 。

講到尾，呢場危機嘅根源喺上游。記憶體巨頭三星、SK Hynix同美光，為咗食盡AI熱潮嘅紅利，已經將產能大幅轉向生產畀AI數據中心用嘅高頻寬記憶體（HBM）。呢個轉向直接抽乾咗手機同電腦市場所需嘅常規DRAM同NAND供應，唔單止推高咗價格，仲令到成班消費裝置生產商要出盡法寶爭取剩返嘅有限貨源 。業界分析普遍相信，呢場記憶體短缺起碼會玩到2027年 。

成個手機行業，而家正係面對半導體供應鏈嘅一場結構性巨變。當AI無底洞咁嘅記憶體需求，竟然可以直接左右緊一款喺銅鑼灣豐澤賣緊嘅中階手機標價嘅時候，供應鏈嘅舊玩法好明顯已經行唔通。對中國品牌嚟講，學似華為咁向上發展高階市場，未必再係一條增長策略咁簡單，直頭係生存嘅唯一出路。